jخلیج اردو
03 مارچ 2021
ملک عاطف خان
اسلام آباد : ہاکستان میں تین مارچ بروز بدھ ہونے والے سینیٹ کے بدھ کے روز ہونے والے انتخاب میں حکمراں جماعت پاکستان تحریک انصاف (پی ٹی آئی) کو اپ سیٹ شکست کا سامنا کرنا پڑا ہے ۔ اسلام آبادکی جنرل نشست پر پی ٹی آئی کے اُمید وار کو 5 ووٹوں کے فرق سے شکست ہوئی ہے۔
اب تک کے سرکاری مگر غیر حتمی نتائج کے مطابق پاکستان پیپلز پارٹی کے امیدوار اوت سابق وزیر اعظم پاکستان یوسف رضا گیلانی نے جنرل نشست پر موجودہ وزیر خزانہ عبدالحفیظ شیخ کو شکست دی ہے۔
پاکستان میں حزب اختلاف کے اتحاد پاکستان ڈیموکریٹک موومنٹ کے مشترکہ امیدوار یوسف رضا گیلانی نے کُل 340 ووٹوں میں سے 169 ووٹ حاصل کیے ہیں جبکہ حکمراں جماعت اور اُس کی اتحادی جماعتوں کے مشترکہ اُمیدوار عبدالحفیظ شیخ 164 ووٹ حاصل کر سکے۔ ریٹرنگ افسر نے نتائج کا اعلان کرتے ہوئے یہ بتایا ہے کہ کل 7 ووٹ مسترد بھی ہوئے ہیں۔
اس نشست کیلئے بظاہر عددی اکثریت نہ رکھنے والی سیاسی جماعت پاکستان پیپلز پارٹی کے چیئرمین بلاول بھٹو زرداری نے نتیجے پر اپنی ٹوئٹ میں لکھا ہے کہ جمہوریت بہترین انتقام ہے۔ جیے بھٹو۔
Democracy is the best revenge. Jeya Bhutto!
— BilawalBhuttoZardari (@BBhuttoZardari) March 3, 2021
دوسری طرف حکمران جماعت نے انتخاب کو چیلنج کرنے کا کہا ہے۔ اپنے ایک ٹویٹ میں وزیر اعظم کے معاون خصوصی ڈاکٹر شہباز گل نے اپنی ٹویٹ میں اس جانب اشارہ کیا ہے۔
غیر حتمی طور پر 7 ووٹ رجیکٹ ہوئے ہیں۔ پانچ ووٹ کا فرق ہے۔ ابھی اس نتیجہ کو چیلنج کریں گے۔
Just an initial response
— Dr. Shahbaz GiLL (@SHABAZGIL) March 3, 2021
تاہم یہ بات قابل غور ہے کہ اسلام آباد سے خواتین کی نشست پر پی ڈی ایم کی ہی امیدوار فرزانہ کوثر جن کا تعلق مسلم لیگ نواز سے ہے ، وہ ہار چکی ہے اور ان کے 161 ووٹ کے مقابلے میں پی ٹی آئی کی امیدوار فوزیہ ارشد نے 174 ووٹ حاصل کیے ہیں اور اس انتخاب کیلئے 5 ووٹ مسترد بھی ہوئے ہیں۔
نتائج پر مسلم لیگ نے بظاہر خوشی کا اظہار کیا ہے اور مسلم لیگ کی ڈیفیکٹو رہنما مریم نواز نے یوسف رضا گیلانی، پی ڈی ایم اور ارکان قومی اسمبلی کو مبارک باد دی ہے۔
یوسف رضا گیلانی صاحب کو دلی مبارکباد۔ PDM کو بھی مبارکباد۔ مسلم لیگ ن کے ممبران ِ قومی اسمبلی کو بھی مبارکباد اور شاباش۔ نواز شریف کے فیصلے اور بیانیے کا مان رکھا اور جھکنے اور بکنے سے انکار کر دیا۔ شاباش مسلم لیگ ن ! مستقبل آپ کا ہے انشاءاللّہ 🙌🏽
— Maryam Nawaz Sharif (@MaryamNSharif) March 3, 2021
ٹویٹر پر اس حوالے سے سینٹ انتخاب ٹاپ ٹرینڈنگ میں ہے اور جہاں یوسف رضا گیلانی کی جیت کا جشن منایا جارہا ہے وہاں یہ اعتراض بھی کیا جارہا ہے کہ ووٹ کاسٹ کرنے والوں نے کسی طرح سے ہارس ٹریڈنگ میں حصہ لیا ہے۔
اس حوالے سے گزشتہ روز یوسف رضا گیلانی کے بیٹے علی گیلانی کی سامنے آنے والی ویڈیو کا ذکر بھی ہورہا ہے اور سمجھا جارہا ہے کہ انتخاب پر اپوزیشن اثر انداز ہوئی ہے۔
