خلیج اردو
راولپنڈی : پاکستان کے آرمی چیف جنرل قمر جاوید باجوہ نے لائن آف کنٹرول کے پدھر سیکٹر کا دورہ کیا ہے جہاں ان کو ایل او سی کی صورتحال، فارمیشن کی آپریشنل تیاریوں پر بریفنگ دی گئی ہے۔
افواج پاکستان کے ترجمان ادارے آئی ایس پی آر کے مطابق آرمی چیف نے پدھر سیکٹر میں لائن آف کنٹرول پر تعینات فوجی جوانوں اور افسران کے ساتھ افطار کیا۔
آرمی چیف جوانوں سے ملے اور ان سے گفتگو کی اور وقت گزارا۔ آرمی چیف جنرل قمر جاوید باجوہ نے فورس کی جنگی تیاری اور جوانوں کے بلند حوصلے کی تعریف کی۔
قبل ازیں ایل او سی پہنچنے پر کور کمانڈر لیفٹیننٹ جنرل ساحر شمشاد مرزا نے آرمی چیف کا استقبال کیا۔
