خلیج اردو
اسلام آباد : وزیراعظم اوربل گیٹس میں ٹیلیفونک رابطہ ہوا ہے۔ دونوں رہنماؤں میں ملکرکام جاری رکھنے پراتفاق کیا گیا۔ وزیر اعظم نے کورونا ویکسین کی منصفانہ، بروقت اور پیمانے پر فراہمی کی اہمیت پر زور دیا
وزیراعظم آفس سے جاری ہونے والے بیان میں بتایا گیا ہے کہ وزیراعظم عمران خان نے بل گیٹس سے ٹیلیفونک رابطہ کیا ہے۔ پاکستان میں پولیو کے خاتمے اور جاری کوویڈ 19 وبائی امراض سمیت مشترکہ تشویش کے امور پر تبادلہ خیال کیا گیا۔
وزیراعظم نے دنیا بھر میں غربت، بیماری اور عدم مساوات کے خلاف جنگ میں بل اینڈ میلنڈا گیٹس فاؤنڈیشن کے کام کی تعریف کی۔وزیراعظم نے خاص طور پر پاکستان میں بل اینڈ میلنڈا گیٹس فاؤنڈیشن کے کام کو سراہا۔
مسٹر خان کا کہنا تھا کہ پاکستان سے پولیو کا خاتمہ حکومت کی ایک اہم ترجیح ہے۔کوویڈ 19 وبائی امراض سے متعلق چیلنجوں کے باوجود ملک بھر میں انسداد پولیو مہم کو تیز کرنے کی کوششیں جاری ہیں۔پاکستان نے 2021 میں پولیو کیسز میں تیزی سے کمی کے ساتھ مسلسل مثبت پیش رفت دیکھی۔پورے سال میں پولیو کا صرف ایک کیس ریکارڈ کیا گیا۔
وزیر اعظم نے کورونا ویکسین کی منصفانہ، بروقت اور پیمانے پر فراہمی کی اہمیت پر زور دیتے ہوئے کہا کہ کم آمدنی والے ممالک کو اس کے سماجی اور اقتصادی اثرات کو کم کرنے میں مدد ملے گی۔
بل گیٹس نے پولیو کے خاتمے کے لیے پاکستان کی جانب سے کی جانے والی حالیہ کوششوں کو سراہا۔بل گیٹس نے پولیو کے خاتمے کے لیے اپنے عزم کا اعادہ کیا۔ انہوں نے پاکستان کی کامیاب کورونا ویکسینیشن مہم کا اعتراف اور گیٹس فاؤنڈیشن کی مسلسل حمایت کا یقین دلایا۔
وزیراعظم اور بل گیٹس نے مشترکہ مقاصد پر مل کر کام جاری رکھنے پر اتفاق کیا۔
