خلیج اردو: متحدہ عرب امارات کی ریاست ابوظہبی میں موٹرسائیکل سواروں کی بڑی مشکل حل کر دی گئی ہے۔ ریاست میں موٹرسائیکلوں کی بڑھتی ہوئی تعداد کے باعث مرکزی علاقوں میں پارکنگ کے مسائل کم کرنے کے لیے 3 ہزار سے زائد نئے سلاٹس متعارف کروائے گئے ہیں۔
پارکنگ کے لیے بنائے گئے ان نئے ہزاروں سلاٹس سے ڈیلیوری رائیڈرز کو بڑی سہولت میسر آئے گی جب کہ بےترتیب پارک کی گئی موٹرسائیکلوں کو منظم انداز میں پارک کرنے کی سہولت بھی ملے گی۔
انٹیگریٹڈ ٹرانسپورٹ سینٹر کا کہنا ہے کہ پارکنگ لاٹس کو تیار کرنے کا مقصد شہریوں کو نقل و حرکت میں آسانی فراہم کرنے کے ساتھ ساتھ صارفین کے اطمینان اور ان کے آرام و سہولت کا خیال رکھنا ہے۔
ٹرانسپورٹ سینٹر نے شہریوں پر زور دیا ہے کہ پبلک پارکنگ استعمال کرنے کے لیے ضابطوں اور ہدایات کی پابندی کریں۔ سینٹر نے خبردار کیا ہے کہ غلط پارکنگ پر سخت قانونی کارروائی کی جائے گی۔
