متحدہ عرب امارات میں نئے قانون کے تحت بغیر اجازت کے عوام میں کسی کی تصویروں پر کلک کرنا اب متحدہ عرب امارات میں قابل سزا جرم ہے جس میں 6 ماہ قید یا 1 لاکھ 50 ہزار سے 5 لاکھ تک جرمانہ یا دونوں ہو سکتے ہیں ، نیا قانون 2 جنوری 2022 سے نافذ العمل ہوگا۔ گلف نیوز کے مطابق متحدہ عرب امارات میں سائبر کرائم کا ترمیم شدہ قانون بڑھتے ہوئے ڈیجیٹل دور میں شہریوں اور رہائشیوں کو زیادہ تحفظ فراہم کرے گا ، نیا قانون بینکوں، میڈیا، صحت اور سائنس کے شعبوں کے ڈیٹا سسٹم کو نقصان پہنچانے جیسے جرائم کے لیے سخت سزائیں پیش کرتا ہے۔
بتایا گیا ہے کہ 2021ء کے نئے وفاقی حکم نامے کے قانون نمبر 34 نے 2012ء کے وفاقی قانون 5 سائبر کرائمز قانون میں بڑی ترامیم متعارف کرائی ہیں ، جس میں آن لائن ہونے والے جرائم کا احاطہ کیا گیا ہے ، اس قانون کا مقصد نیٹ ورکس اور انفارمیشن ٹیکنالوجی پلیٹ فارمز کے استعمال کے ذریعے کیے جانے والے آن لائن جرائم کے خلاف کمیونٹی کے تحفظ کو بڑھانا ، پبلک سیکٹر کی ویب سائٹس اور ڈیٹا بیس کی حفاظت کرنا ، افواہوں اور گمراہ کن یا جعلی خبروں کے پھیلاؤ کا مقابلہ کرنا ہے۔
-الیکٹرانک فراڈ
نیا قانون انٹرنیٹ صارفین کو الیکٹرانک فراڈ سے تحفظ فراہم کرتا ہے اور ذاتی رازداری اور حقوق کو محفوظ رکھتا ہے ، یہ عدالتوں کو جرائم میں استعمال ہونے والے آلات، سافٹ ویئر، مواد یا دیگر ذرائع کو ضبط کرنے کا اختیار دیتا ہے ، قانون کے آرٹیکل 5 میں کہا گیا ہے کہ کوئی بھی شخص جو جان بوجھ کر کسی سرکاری ادارے یا اہم سہولت کی ویب سائٹ کو نقصان پہنچاتا ہے، معطل کرتا ہے یا اسے روکتا ہے اسے 5 لاکھ درہم سے 3 ملین درہم کے درمیان جرمانہ اور جیل ہو سکتی ہے۔
-جامع قانونی فریم ورک
ورلڈ سینٹر ایڈوکیٹس اینڈ لیگل کنسلٹنٹس کے سینئر قانونی مشیر واجہ امین عبدالعزیز نے کہا کہ نئی ترامیم میں آن لائن ہونے والے جرائم کا احاطہ کیا گیا ہے، بشمول دھونس، ایذا رسانی اور جعلی خبروں کو پھیلانا ، یہ آن لائن ٹیکنالوجی کی ترقی کے باعث پیدا ہونے والے خدشات کو دور کرنے کے لیے خطے کے پہلے جامع قانونی فریم ورک میں سے ایک ہے ، نئے قانون میں اہم تبدیلیوں میں سے ایک عوامی مقامات پر لوگوں کی ریکارڈنگ سے متعلق ہے، جو اب قابل سزا جرم بن چکا ہے۔
انہوں نے کہا کہ عوامی مقامات پر دوسروں کی تصاویر لینا ایک متنازعہ موضوع تھا کیوں کہ یہ صرف اس صورت میں جرم ہوتا تھا جب تصویر کسی نجی جگہ پر لی جاتی تھی ، عوامی جگہ پر نہیں ، قانون میں ترمیم اب اسے [عوامی جگہ پر کسی کی تصویر کھینچنا] قابل سزا بناتی ہے، جو شخص عوامی یا نجی جگہوں پر دوسروں کی تصاویر کھینچتا ہے اور ان کی اجازت کے بغیر کسی فرد یا خاندان کی رازداری کی خلاف ورزی کرتا ہے اسے چھ ماہ قید اور ڈیڑھ لاکھ سے پانچ لاکھ درہم کے درمیان جرمانہ یا دونوں سزا دی جائے گی۔
‘دوسروں کی رازداری کا تحفظ’
عبدالعزیز نے مزید کہا کہ اگلے سال 2 جنوری سے کسی شخص کو ٹریک کرنے یا خفیہ طور پر اس کی ریکارڈنگ کے لیے عوامی مقامات پر تصاویر لینا جرم ہوگا ، لوگوں کو یہ سمجھنے کی ضرورت ہے کہ عوامی مقامات پر تصویریں کھینچنا منع نہیں لیکن تصویر کھینچتے وقت دوسروں کی رازداری کا خیال رکھنا چاہیے ، لوگ عوامی مقامات پر تصاویر اور سیلفیز لے سکتے ہیں اور اپنے لمحات کو آزادانہ طور پر دستاویز کرسکتے ہیں لیکن کسی کو ہمیشہ یاد رکھنا چاہیے کہ دوسروں کی رازداری کی خلاف ورزی نہ کریں اور ان کی ذاتی رازداری اور حقوق کا احترام کریں۔
-قانون سازی کی اصلاحات
نیا قانون اگلے 50 سالوں کے لیے ملک کی طرف سے اعلان کردہ اہم قانون سازی اصلاحات کے مطابق ہے ، سائبر کرائم قانون میں ترامیم متحدہ عرب امارات کے اٹارنی جنرل کو کسی ایسی ویب سائٹ یا پلیٹ فارم کو بلاک کرنے کا مقدمہ جاری کرنے کا اختیار دیتی ہیں جو قانون کی خلاف ورزی کرتی ہے یا متحدہ عرب امارات میں ہدایت کردہ سائبر کرائم کا ارتکاب کرتی ہے ، چاہے پلیٹ فارم متحدہ عرب امارات سے باہر ہی کیوں نہ ہو۔
