خلیج اردو: متحدہ عرب امارات نے دنیا بھر کے شہریوں کے لیے 5 سالہ ملٹی پل ٹورسٹ ویزہ کے اجرا کو مزید آسان بنانے کا اعلان کردیا ہے۔
متحدہ عرب امارات نے تمام ممالک کے شہریوں کیلیے 5 سالہ ملٹی پل ٹورسٹ ویزہ کے اجرا کو مزید آسان بناتے ہوئے اس کے لیے کسی اسپانسر یا اندرون ملک میزبان کی شرط ختم کردی ہے جب کہ دیگر چار شرائط عائد کی ہیں جن پر آئندہ ماہ 3 اکتوبر سے عملدرآمد شروع کیا جائے گا۔
عرب میڈیا کے مطابق ملٹی پل ٹورسٹ ویزہ کے خواہشمند افراد کو درخواست دیتے وقت 4 ہزار ڈالر بیلنس کا بینک اسٹیٹمنٹ دینا ہوگا اور یہ اسٹیٹمنٹ ویزے کے حصول کی درخواست دینے کی تاریخ سے 6 ماہ پہلے تک کا ہونا چاہیے، اس کے ساتھ ویزا فیس، مالیاتی گارنٹی اور ہیلتھ انشورنس اسکیم بھی ضروری ہوگی۔
اس کے علاوہ ویزا لینے والے کو اپنے امارات آمد کا مقصد بتانا ہوگا اور اس کو کسی بھی صورت ایک سال سے زیادہ قیام کی اجازت نہیں ہوگی۔
نئی شرائط کے ساتھ 5 سالہ ٹورسٹ ویزہ لینے والے کو متعدد سہولتیں اور رعایتیں بھی فراہم کی جائیں گی جس کے تحت ویزا ہولڈر 90 دن تک مسلسل امارات میں قیام کرسکے گا جب کہ اس میں مزید 90 روز کی توسیع بھی ہوسکتی ہے، تاہم اس سے قبل امارات میں قیام کی کل مدت ایک سال میں 180 دن سے زیادہ نہ رہی ہو۔
