جاپانی ایئر فورس کا طیارہ دوران پرواز لا پتا ہوگیا

خلیج اردو: جاپانی ایئر فورس کا ایک طیارہ اڑان بھرنے کے کچھ دیر بعد لاپتا ہو گیا، جس کی تلاش جاری ہے۔

تفصیلات کے مطابق جاپان کا ایف 15 طیارہ اڑان بھرنے کے بعد لاپتا ہوگیا ہے، جاپانی وزارت دفاع کا کہنا ہے کہ آج لاپتا ہونے والا ایف ففٹین طیارہ جاپانی ایئر سیلف ڈیفنس فورس کا ہے۔

جاپان کے سرکاری خبر رساں ادارے کے مطابق بحیرۂ جاپان میں ایک شخص کو دیکھا گیا، جس کے بارے میں سمجھا جا رہا ہے کہ وہ ٹیک آف کے بعد لاپتا ہونے والے طیارے کے عملے کا رکن ہے، جسے بچانے کی کوشش کی جا رہی ہے۔

طیارے کے لاپتا ہونے سے متعلق تحقیقات جاری ہیں، جاپانی وزارت دفاع کے مطابق طیارے نے وسطی جاپان کے کوماٹسو ایئربیس سے ٹیک آف کیا تھا، اور مقامی وقت کے مطابق شام ساڑھے پانچ بجے کے قریب بحیرۂ جاپان پر محو پرواز تھا، جس کا فاصلہ ایئر بیس سے پانچ کلومیٹر ہے، اور پھر وہ وہاں راڈر سے غائب ہوگیا۔

جاپانی فضائی دفاعی نظام کے ترجمان کے مطابق طیارہ 2 افراد کی گنجائش والا ہے، تاہم اس وقت یہ پتا نہیں چل سکا ہے کہ اس میں کتنے افراد موجود تھے۔