دبئی سے بھارت جانے والے ایک شخص کو نئی دہلی میں کسٹم حکام نے برقی لوہے کے اندر چھپایا ہوا سونا اسمگل کرنے کے الزام میں گرفتار کر لیا ۔ اماراتی خبر رساں ادارے دی نیشنل کی ایک رپورٹ کے مطابق بھارتی مسافر نے تقریباً 1 لاکھ 64 ہزار درہم مالیت کا سونا پگھلا کر استری کے دھاتی حصے کے اندر چھپا دیا اور اس کی ظاہری شکل کو چھپانے کے لیے اس پر چاندی کی پالش بھی کی گئی تاہم اس ہندوستانی مسافر کو اُس وقت پکڑا گیا جب وہ ہوائی اڈے پر آنے والے ’نتھنگ ٹو ڈیکلیئر‘ چینل سے گزر رہا تھا ۔
بتایا گیا ہے کہ اگر مسافر کی طرف اسے اس سونے کے بارے میں بتا دیا جاتا تو اسے 699 گرام سونے پر 10اعشاریہ 75 فیصد درآمدی ٹیکس لگتا جو تقریباً 16 ہزار 500 درہم بنتا ہے کیوں کہ قوانین کے تحت مرد 20 گرام تک سونا درآمد کر سکتے ہیں جب کہ خواتین مسافروں کو ٹیکس ادا کیے بغیر 40 گرام تک سونا لانے کی اجازت ہے تاہم ایسے مسافر جو اپنے ساتھ مزید سونا لے کرجانا چاہتے ہیں انہیں بارڈر کنٹرول پر پہنچنے پر اس کا اعلان کرنا ہوگا اور امپورٹ ڈیوٹی ادا کرنا ہوگی۔
ادھر دبئی میں ایک ولا سے سونا ‘ زیورات اور ہزاروں درہم نقدی چوری کرنے پر 2 ایشیائی باشندوں کو قید کی سزا سنادی گئی ، دبئی کی فوجداری عدالت نے 2 ایشیائی باشندوں کو 2 سال قید اور 12 ہزار درہم جرمانے کی سزا سنائی ہے ، دونوں کو قید کی سزا کے بعد ملک بدر کرنے کا بھی حکم دیا گیا ہے ، دونوں ملزمان پر دبئی ہلز کے علاقے میں ایک تاجر کے ولا میں چوری کا الزام عائد کیا گیا تھا۔
معلوم ہوا ہے کہ ملزمان نے ایک سیف چرایا جس میں 12,000درہم نقدی ، زیورات اور قیمتی گھڑیوں کے ساتھ ساتھ سرکاری دستاویزات اور کپڑے بھی تھے ، یہ واقعہ اگست 2021 میں اس وقت سامنے آیا جب ایک تاجر نے رقم ، زیورات، سونے کی اینٹوں، قیمتی پتھروں اور معروف برانڈز کی قیمتی گھڑیوں کی چوری کی اطلاع دی تھی جو اس کے ولا میں محفوظ رکھی گئی تھیں ، متاثرہ کی گواہی کے مطابق وہ جولائی میں اپنی بیوی ، نوکرانی اور بچوں کے ساتھ ملک سے باہر گیا ہوا تھا لیکن جب وہ ملک واپس آئے تو اس نے ٹوٹا ہوا دروازہ دیکھا۔
تفتیشی ٹیم نے مصدقہ اطلاع ملنے کے بعد مجرموں کو تلاش کیا اور ان کا پتہ لگایا کہ ایک مجرم اس کیس میں ملوث تھا ، پولیس نے تین دن کے بعد ان سے رابطہ کیا اور انہیں مسروقہ سامان کے ساتھ مجرموں کی گرفتاری کے بارے میں بتایا ، تاجر اور اس کی بیوی کو پولیس سٹیشن میں بلایا گیا اور انہیں ضبطی دکھائی گئی تو انہوں نے چوری شدہ اشیاء اور ان کے سامان کی تصدیق کی۔
پہلے مجرم نے اعتراف کیا کہ اس نے کئی دنوں تک گھر کی نگرانی کرنے کے بعد دوسرے کے ساتھ چوری کرنے پر رضامندی ظاہر کی تاکہ اس بات کو یقینی بنایا جا سکے کہ وہاں کوئی نہیں رہ رہا ، انہوں نے گھر میں گھس کر رقم ، زیورات چوری کیے ، اس جرم میں اس کا حصہ 30 ہزار درہم تھا اور دوسرے مجرم نے زیورات اپنے رشتہ دار کے گھر چھپا رکھے تھے ، اس رشتے دار کو عدالت نے بری کردیا۔
